السلام عليكم،،
هاني جيت،، توحشتوني شوية ولا لالا
هيا بلا منبدا نهرف،، متديروش عليا راه غلبني رمضان،،
راح نعطيكم واحد الوصفة نتاع واحد القاطو ( زعما حاجة أخرا)
شوفو واش فيه:
3 كيلات كاوكاو يكون مرحي وهو نيئ وبقشورو،،
يسما متعبو رواحكم وتgليوه متشريو المgلي والمقشر
جيبو هداك الرخيس فيهم خلاص هذاك هو المطلوب ،ترحيوه ميكون رطب ميكون خشين بزاف.
زيدو كيلة نتاع سكر،،
نفس الكيلة هاه،، تعودو تديرو كيلة كاوكاو بصحن وكيلة سكر بفنجان
هاه وتزيدو فنجان تاع زبدة، وشوية فاني وشوية نتاع قشور القارص،
هاذو المواد تخلطوهم مع بعضاهم وتبللو بالبيض،،
تبللو ببياض البيض برك حتى يتماسك الخليط
وبعدين يا حلويت تشكلوهم كويرات وتديرو حفرة صغيرونة في الوسط،،
تدهنو السينية بشوية زبدة وتستفو الكويرات عليها،
تدخليهم للفرن يطيبو شوية برك قيس ما يحمارو شوي هدا مكان وتخرجوهم،،
لما تخرجوهم يا شاااطرات تحطوهم في الشاربات يتعسلو،
والشاربات لازم تكون شوية عاقدة كيلة سكر بكيلة ونص تاع الماء
كي تسقسوهم خليوهم ليلة يباتو باش يشربو مليح، والغدوا هذيك حطو شوية معجون في الحفرة هذيك للي خليتوها من قبل.
رشو عليهم سكر قلاصي وشوية لماع،،
ويخرج قاطو تحفة وفي البنة مخلاش.
وبالف صحة وهناء،،
نشالله منكونش ثقلت عليكم،، واسمحولي على رداءة الصور.
الخميس سبتمبر 29, 2011 6:14 pm