تريب جهاز العروسة الجزائرية

انا حبيت نحط طريقة متسلسلة لكيفية تزين التروسو تع العروسة بجميع المعطيات والافكار البسيطة
واتمنى من الكل اللي عنده احتراقح جديد او فكرة جديدة يحطها بالموضوع عشان الكل يستفيد منها
لانو انا تاني مخطوبة وحبيت نفيدكم بمعلوماتي ونتمنى تفيدوني بما هو جديد في قش العروسة



المهم منطولش عليكم وندخل في التفاصيل

اول شي نجيبو شرائط الساتان اللي هي الحاشية راهو يديو اغلب شي بيضاء او دوغي تاني لازم تكوني خادمة من قبل ورد اللي تشبحي بيه الحوايج ( معنديش صور اما الخدمة راني خادمة كلشي ولكن صور لتوضيح معنديش باش نقربلكم الفكرة اكثر ولكن عن قريب انشاء الله يمكن ننزل لكم صور للفائدة )
وتاني بالنسبة للحوايج لازم كل حاجة وحدها لي بودي متلا او تريكوات تع الشتاء وحدهم مع ليبول حديهم وطويهم مليح بطريقة جيدة جدا وملفتة للنظر وكل بيلة كيما يقولو زعما كي تطوي لي بدي كامل وحدهم اربيطهم بطريقة جميلة بالحاشية ومديريلهمش الورد حتى كي يدو القش لبيتك كي يخملو القش هما يديرولهم الورد ولازم الورد تخدمي اللون الازق باش ديريهم في حوايج تع الراجل باسكو لازم تدي للراجل بيجامة + تريكوات + جوارب + وملابس داخلية + بليغة + بانتوفة+ بينوار تع حمام + المهم ديريلو فاليزا وحده تاع اديها نهار القش ولازم تديلو الريحة + شومبوا+ جال دوش + جوتابل+ عطر ومرهم خصوصي لحلاقة +صابون + فرشاة الاسنان+ معجون الاسنان+ فوط ) لازم تديهم راهم كامل يديرو هاد العفسة حتى انا راني نجهز بشوية مي اانا مزال عرسي انشاء الله
ايه وحوايج الراجل تديريلهم بالحاشية الفاروزي اي الزقاء اللون
المهم وكيما التايورات تعلقيهم بطريقة جميلة تاني والسبابط و البلايغ والباننتوفات تديرهم في الدرج ( قجر) بطريقة جميلة وشابة
وتاني كيما ملابسك الداخلية لازم تخدميلهم براوات بالورد براوت جميلة مزينة وتديريهم فيها وتاني الجوارب في برية وحدهم وتاني الفولارات تع الحمام تاني ديريهم في برية وحدهم المهم ديري 4 بريات وحدة تع الملابس الداخلية تع من فوق ...... ولخرى تع الملابس الداخلية من تحت ....
ولخرى للجوارب ولخرى للفولارات
وتدري الريحة ادري 4 او 5 متكثريش من بعد تشري تشري ولازم تدي ديودوغون تاني متكتريش ديري 3 او 4 فقط من بعد تشري
وتاني ااذا كان عرسك في شتاء كثري حوايج شتاء على الصيف والعكس اذا رحتي فصيف كتري حوايج الصيف على تع الشتاء باسكو تشري من بعد تشري
ديري حوايج الشتاء ديري 2 تايورات شابين تع خرجة وشري ليجوب طوال + ليجوب ميني تع شتاء طبعا تلبسيهم + لي بودي + ليكات تع شتاء شابين مع سراولهم و اشري 2 جبب مستورين شابين وديري ليسوغفاتمون مع بيجامات شابين + فيزوات + قمايج + تريكوات داخلية + جوارب متكثريش الملابس لانه من بعد راح تشري تشري اكيد
وحوايج الصيف ديري فساتين قصيرة وفساتين مستورة طورية تاني لي بونتاكوغ + وتنورات طويلة وقصيرة مع البوديات تاعهم المهم الحوايج راهم باينين


ولشوار ديري شورة تع البرودي + شورة تع البواندوكخوا + شورة تع غرزة الحساب وهادو مش مهمين لبعض المناطق بالجزائر ولكن بالنسبة لمنطقتي مهمين جدا ولازم العروسة تديهم معاها + 2 كوفيرطات +2 ليكوات شابين تع حطة + كوفغولي شبااااااااااااااااب + دراوات تع كل يوم تدي متلا 5 او 6 ليزور تع كل يوم لانه لازم نهار تبدلي الفرشة اللي ترقدي عليها ونهار لالا لازم تغير الفراش يوم بعد يوم ودييري زربية بليصوندولي تاعها تاني لشوار حديهم مليح عند الديغريساج واطويهم مع بعضاهم واربطيهم بالحاشية المهم كل حاجة تطويها اربطيها بالحاشية حتى الزربية وليصوندولي اربطيهم بالحاشة لويهم وشبحيهم بالحاشية وديريلهم بابيون

والشباحات تع لاكوافوز متشبحوش لريحة هاديك كانت بكري بكري في عهد ماما وجداتي الله يرحمهم قولو آمين ))))
كاين ساغفيس تع لاكوافيز راهو ينباع سبيسيال حاجة شابة بزاااااااف وتانيت لازم تخدمي الصابون وتغلفيه وتشبحيه بالورد وتحطيه في لاكوافيز باش يتلق الريحة ولازم تدي ليفاز وتديريلهم ورد شباب تع لا كوافيز ولازم تشري فيزان كبار شوية بالورد تاعهم ديريهم فوق الخزانة
اما بالنسبة للصابون راهم يديرو صابون مخدوم بالورد تحطيه فلخزانة مع الحوايج لازم يكون مخدوم تحطيه باش يتلق الريحة فلخزانة عفسة جديدة هادي تاني مي لازم يكون متحوف بالطبع مشي عبزي الورد وديريه وخلاص ديري جهاز شباب ولا متعييش روحك يا ختي
وتانيت ديري سليلة غلفيها بالقماش وخدميها بالورد وديري فيها مساسك ولي شوشو وكيكينات وليسوختات + مشطات + سلاك
وديري سليلة شابة بالورد ديري فيها دوزان تع الخياطة م تلا ديري الخيط بجميع الالوان ديري مقص ديري ليباري ديري مخيدة تع ليزيبانغل
ولازم تدي مفيتحات تع الخزانة كي يكملو يخملو الحوايج وكامل ويفرشو البنك بشروة والكوفغولي تاعك نتي يعلقو المفيتحات فلخزانة وراهم يديرو تانيك وحد العفسات كي المفيتحات بالورد تعلقيها في الباس تع الباب
واذا كنتي بيتك وحدك لازم تدي تروسو تع الكوزينة يا الحنونة تدي طابيالت تع الشغل الطابليات تع الشغل لازم تديهم سواءا ككنتي بيتك وحدك ولا لالا وتانيت نزيدلك حاجة لازم تديري زربية تع صلاة + حجاب الصلاة وتربطيهم بالحاشية وحدهم اختي الكريمة مشي تدي دوزان الصلاة في باطل لازم كي تروحي لبيتك متخليهش غير شباح صلاتك ثم صلاتك باش ربي يباركلك في زواجك ويرزقك بالذرية الصالحة .... المهم

ولازم تدي بينوار تع شتاء خشين وبينوار تع صيف او 3 تع صيف انتي ومقدورك حنونتي وليزابيي تعلقيها مع البيجامة تع الراجل ولازم تدي الفوط اللي هما سرابت تع الصبوحي السرابت هادو لازم يكونو شابين تانيت هادو علقيهم في البوخت مونتو مع ليزابيي + بيجامة تع الراجل
ولازم تدي لينابخون شبااااااااااااب تع الكروشي هادو تع الكروشي ديرهم ياماتك الاولى زعما شهرين ولا وزيدي ادي لينابخو تع شنواوا راهم ينباعو خيري حاجة شااااااااابة ديريهم كل يوم ولخرين خليهم وقت السبة زعما تجيك عجوزتك ولا لوستك اذا كنتي تسكني وحدك شبحي بيتك او ضياف او هكا ولا ولازم تخلي بيتك ديما مخمل وشباب تفكري بلي راكي عروووووووووووووووسة ولازم اللي يجي توريله بيتك يالحنونة مي لازم تكون بيتك مخملة بيان وكما يجب وراهم ياخدو معاهم تاينت سليلة ديري فيها صابون وغلفيه بالمشاور وربطيهم بالحاشية باش كي يدخل كاش ضيف يجي لبيتك كي توريله بيتك مديله طرف صابون وديريله الريحة متكونيش مهبولة ومتمدي والو راكي عروسة مدي صابون للعواتق باش يربحو عليك وعقوبة لكااااااااااااااامل لبنات انشاء الله
وتانين بالنسبة للمشاور تاعك ديري كي شغل فونتاي اخدميها بالورد وغلفيها وديري فيها المشاور تاعك وشبحيها مع الفط = السرابت



انشاء الله نكون افدتكم واللي عنده حاجة يتطرق بيها مذا بينا الكل يستفاد معانا وانا عن قريب انشاء الله نحاول ننزللكم تصارو لجميع اعمالي وتجهيزاتي وطرقي في تجهيز تروسو تاعي وربي يعاون كل عروسة وعروسة في تجهيز جهازها